Əziz Tələbələr!
Siz gənclər bu gün yeni bir mərhələyə qədəm qoyaraq gələcəyimizin qüruruna çevrilmisiniz. Tələbə adını qazanmaqla yalnız öz arzunuzu deyil, ailənizin və müəllimlərinizin ümidini də doğrultmusunuz. Qarşıda sizi gözləyən illərdə biliyinizlə, əzminizlə vətənimizin inkişafına böyük töhfələr verəcəyinizə inanırıq.
Dəyərli Valideynlər!
Övladlarının uğuru ilə sevinən bütün valideynləri ürəkdən təbrik edirik. Bu uğurun təməlində sizin fədakarlığınız, diqqətiniz və övladlarınıza bəslədiyiniz inam dayanır. Sizin zəhmətiniz sayəsində gənclərimiz bu gün bu mərhələyə çatmışdır.
Əziz Müəllimlər!
Şagirdlərinin yolunu biliklə işıqlandıran bütün müəllimlərə dərin minnətdarlığımızı bildiririk. Sizin əzminiz, səbriniz və peşəkarlığınız sayəsində bu uğurlar gerçəkləşdi. Gənclərimizin qazandığı hər bir nəticədə sizin imzanız var.
Qəbul ola bilməyən gənclərimizə isə xüsusi sözümüz var:
Bir imtahan nəticəsi həyatınızı müəyyən etmir. Qarşınızda yeni imkanlar, yeni yollar var. İnamla addımlayın – gələcək sizin əlinizdədir. Uğur yalnız inadkar və iradəli insanlara məxsusdur.
Sumqayıt Bələdiyyəsi olaraq biz qürurla bildiririk ki, Sumqayıtın yetişdirdiyi gənclər hər il ölkəmizin nüfuzlu ali məktəblərinə daxil olaraq həm şəhərimizin, həm də dövlətimizin adını uca tutur. Bu uğurlar Sumqayıtın elmə, biliyə və gələcəyə verdiyi dəyərin ən böyük göstəricisidir.